സിവില് സർവീസ്; ഒന്ന് ശ്രമിച്ചു നോക്കൂ...
നഷ്ടമില്ല, എങ്ങനെ നോക്കിയാലും ലാഭം
പരീക്ഷയ്ക്കു ശ്രമിക്കുന്നവരിൽ ചെറിയൊരു ശതമാനത്തിനു മാത്രമേ സിവിൽ സർവീസിൽ കയറാൻ കഴിയാറുള്ളൂ. എങ്കിലും അതിനുള്ള ഒരുക്കവും ചിട്ടയായോടെയുള്ള തയാറെടുപ്പും ഒരിക്കലും വെറുതെയാവില്ല. സംസ്ഥാന തലത്തിലും ദേശീയ തലത്തിലും പിഎസ്സി, സ്റ്റാഫ് സിലക്ഷൻ കമ്മിഷൻ തുടങ്ങിയവ നടത്തുന്ന മറ്റ് ഒട്ടേറെ മൽസരപരീക്ഷകളിൽ മുന്നിലെത്താൻ ഈ തയാറെടുപ്പ് സഹായിക്കും. ഒരിക്കൽ പിന്നിലായാലും വീണ്ടും സിവിൽ സർവീസസ് പരീക്ഷ എഴുതാനുള്ള അവസരം ലഭിക്കുന്നതിനാൽ ആദ്യ ശ്രമം തയാറെടുപ്പിന്റെ ഭാഗമായിരുന്നു എന്നു കരുതുന്നവരും ഉണ്ട്. സിവിൽ സർവീസിൽ ഒന്നാം റാങ്ക് ഉൾപ്പെടെ ഉന്നത റാങ്കുകൾ നേടിയ പലരും മുൻ വർഷങ്ങളിൽ പിന്നിൽ നിന്നിട്ടും ഉൽസാഹത്തോടെ പരിശീലനം തുടർന്നവരാണ്. ആത്മവിശ്വാസമാണ് പ്രധാനം.
പ്രിലിമിനറി— തയാറെടുപ്പ്
പുസ്തകപ്പുഴുക്കളെയല്ല, നന്മയുടെ വഴിയിലൂടെ യുക്തിയും ബുദ്ധിയും നല്ലവണ്ണം പ്രയോഗിക്കാൻ കഴിവുള്ള ഏറ്റവും മെച്ചമായ ഉദ്യോഗാർഥികളെ തിരഞ്ഞെടുക്കുന്നതിനുതകുന്ന സിലബസാണ് പ്രിലിമിനറിക്ക്. തീരുമാനങ്ങളെടുക്കാനുള്ള കഴിവ്, ജീവിതമൂല്യങ്ങൾ, നല്ല പെരുമാറ്റരീതികൾ, തർക്കപരിഹാരശൈലികൾ, ഫലപ്രദമായ ആശയവിനിമയം, പ്രചോദകശീലങ്ങൾ, സാമൂഹികമനഃശാസ്ത്രം, മാനേജ്മെന്റിലെ അടിസ്ഥാനതത്വങ്ങൾ, പൊതുഭരണരീതികൾ, സാമ്പത്തികപ്രവർത്തനങ്ങൾ, നിയമം, ഐടിയുടെ അനുഗ്രഹങ്ങൾ, സുരക്ഷാവ്യവസ്ഥകൾ, രാജ്യാന്തരബന്ധങ്ങൾ തുടങ്ങി വിവിധ മേഖലകളിൽ നിന്നു ചോദ്യങ്ങൾ ഉണ്ടാവും. ഉത്തരം നൽകുമ്പോൾ തീരുമാനങ്ങൾ കേവലം യാന്ത്രികമാകരുത്, പകരം മൂല്യങ്ങൾക്കു കൂടി പ്രാധാന്യം നൽകണം.
ഒന്നു ശ്രദ്ധിക്കൂ
∙ വായന കരുത്താക്കുക, പരീക്ഷയിൽ വിജയിക്കുമെന്ന വിശ്വാസം തുടക്കത്തിലേ പുലർത്തുക.
∙ നല്ല രണ്ടു പത്രങ്ങൾ, ഒരു ന്യൂസ് മാഗസിൻ, ഒരു മത്സരപ്പരീക്ഷാ പ്രസിദ്ധികരണം എന്നിവയെങ്കിലും സ്ഥിരമായി വായിക്കുക. സഹായകമായ ഓൺലൈൻ മാഗസീനുകളും പ്രയോജനപ്പെടുത്തുക. സുപ്രധാന വാർത്തകളിലെ സംഖ്യകളും വ്യക്തി/സ്ഥല നാമങ്ങളും മനസിലുറപ്പിക്കുക.
∙ കൃത്യതയോടെ, ആത്മവിശ്വാസത്തോടെ ഇംഗ്ലിഷിലൂടെയുള്ള ആശയവിനിമയം ശീലിക്കുക. ഇംഗ്ലിഷ് പ്രസിദ്ധീകരണങ്ങൾ വായിക്കുന്നത് ഗുണം ചെയ്യും.
∙ വിദേശവ്യക്തികളുടെയും സ്ഥലങ്ങളുടെയും മറ്റും പേരുകൾ നിലവാരമുള്ള റേഡിയോ/ടിവി ന്യൂസിൽ ശ്രദ്ധിച്ചു കേൾക്കുക. ഇത് ഇന്റർവ്യൂവിൽ തുണയാകും.
∙ പ്രശ്നങ്ങൾ സ്വയം വിശകലനം ചെയ്തു കാതൽ കണ്ടെത്തി ബോധ്യപ്പെടുക.
∙ കണ്ണിൽക്കണ്ട കൂറ്റൻ പുസ്തകങ്ങളെല്ലാം വാങ്ങിക്കൂട്ടാതെ, പരീക്ഷയ്ക്കു പറ്റിയ പുസ്തകങ്ങൾ മാത്രം ശേഖരിച്ചു സശ്രദ്ധം പഠിക്കുക. എന്തു പഠിക്കുമ്പോഴും കുറിപ്പെടുത്തു സൂക്ഷിക്കുക.
∙ അടിസ്ഥാനവിഷയങ്ങൾക്ക് എൻസിഇആർടി പുസ്തകങ്ങളെ ആശ്രയിക്കുക.
∙ പ്രസക്ത ഘടകങ്ങളെല്ലാം പരിഗണിച്ച് ഐഛികവിഷയം ബുദ്ധിപൂർവം തിരഞ്ഞെടുക്കുക.
∙ വിവരണരീതി ഉത്തരങ്ങൾ എഴുതുന്നതിനു മുൻപ് പോയിന്റുകൾ അടുക്കി, ഓരോന്നും വികസിപ്പിക്കുക. എഴുതാനുള്ള വൈഭവത്തിൽ ശ്രദ്ധിക്കുക.
∙ കണക്കുകളുള്ള വിഷയങ്ങളിൽ അവ ചെയ്തു പഠിക്കുക.
∙ ഐഛികവിഷയങ്ങളിൽ വരാവുന്ന ഉപന്യാസങ്ങൾ ഇനംതിരിച്ച് ഓരോന്നിലെയും പോയിന്റുകൾ ഫയലിൽ ക്രമത്തിന് അടുക്കിയെഴുതി സൂക്ഷിക്കുക.
∙ മുൻവർഷങ്ങളിലെ ചോദ്യങ്ങൾ വിശകലനം ചെയ്യുന്നതു ഗുണം ചെയ്യുംം നമുക്കു നേരിടേണ്ടിവരാവുന്ന ചോദ്യങ്ങൾ ബുദ്ധിപൂർവം ഊഹിച്ചു പ്രത്യേകം തയാറെടുക്കാൻ ഇതു സഹായിക്കും.
∙ പ്രിലിമിനറി കഴിഞ്ഞ് ഫലത്തിനു കാത്തു നിൽക്കാതെ മെയിനിനുള്ള തയാറെടുപ്പു തുടരുക.
∙ പരിശീന സമയത്ത് 12- 15 മാസക്കാലം ഏകാഗ്രത പ്രധാനമാണ്.
∙ പഠനത്തിനുപറ്റിയ ടൈംടേബിൾ തയാറാക്കി പാലിക്കുകയും, അതിൽ ഇടയ്ക്കിടെ പ്രായോഗികമായ മാറ്റങ്ങൾ വരുത്തുകയും ചെയ്യുക.
∙ ഒബ്ജെക്റ്റീവ് ചോദ്യങ്ങൾക്കു സമയബദ്ധമായി ഉത്തരം അടയാളപ്പെടുത്തി പരിശീലിക്കുക.
∙ ഇന്റർനെറ്റ് നോക്കുമ്പോൾ സൈറ്റിന്റെ വിശ്വാസ്യത ഉറപ്പുവരുത്തുക.
∙ ചില ഉപന്യാസങ്ങളെങ്കിലും സമയക്രമം പാലിച്ചു വ്യക്തമായ കൈയക്ഷരത്തിൽ എഴുതിനോക്കുക. വിദഗ്ധരെ ഇവ കാണിച്ചു നിർദേശങ്ങൾ ആരായുക.
∙ ഇന്റർവ്യൂവിനു സഹായകമായ വിധത്തിൽ, യഥാർത്ഥ ചിത്രം വെളിവാക്കുന്ന വിധം സ്വന്തം ബയോഡേറ്റ തയാറാക്കിവയ്ക്കുക.
∙ മോക്ക് ഇന്റർവ്യൂവിൽ പങ്കെടുത്ത് തെറ്റുകൾ തിരുത്തുക. ഇന്റർവ്യൂ വേളയിൽ ബോർഡംഗങ്ങളുടെ പ്രതികരണങ്ങളെപ്പറ്റി ചിന്തിച്ചു മനസു പുണ്ണാക്കാതെ ഉത്തരങ്ങളിൽ ശ്രദ്ധിക്കുക. മറ്റൊരാളായി നടിക്കാൻ ശ്രമിക്കാതെ തനിമയും സത്യസന്ധതയും പുലർത്തുക.
∙ ഇന്റർവ്യൂവിനു പോകുന്നതിനു മുൻപ് പ്രധാന കാലികസംഭവങ്ങൾ കൃത്യതയോടെ പഠിച്ചു വിലയിരുത്തി, അവയെ സംബന്ധിച്ച് അഭിപ്രായങ്ങൾ രൂപപ്പെടുത്തുക. കേരളത്തെപ്പറ്റി പരമാവധി വിവരങ്ങൾ കൃത്യമായി ഓർമ വയ്ക്കുക.
Comments
Post a Comment